Ricualificazion dal San Lurinç

Comi chi ducj a si spetâvin, tal'aministrazion, amigûs par bêvi un taj in ostaria e cjacarà fra int ca pos cucâsi tai voi cença vergognâsi non'de! Un biel grup di sòrs e orbus ca nicin il cjâf a comando comi pipins. Nissun cul coragju da gjavâsi foûr schifât (...encja a costo da riscjà la cjadrea) e metisi dala banda dal paeîs. Pasiensa sin pensarin in avrîl...
Vidûdis però li balonis mitudis tal plàt (numer di dipendenz...) e il ridicul progjet di ricualificazion presentât (li scrovarîs ca an fat tal Jouf e il rimboscjament a son incjimò in biela mostra...) i paesans a volin da un spont par ricualificà par dabon il San Lurinç: fâlu doventà un biel monument naturâl ala viliacaria, ala mancjança di personalitât e al cjatîf gust! Si podaresin fâ senteîrs a tema par fa viodi cemont ca si pos ruvinà una mont intrea, si podaresin fa cartei e stazions par mostrà i progjes dal Zillo (e fâsi dali ridudis grasis) o fa libris culi balonis contadis fint'ades (ucussì magari a tocjarà encja asumi int...).

Mandi a ducj e grazie a chei ca si batin incjimò par Manià!

Cuatri cjacaris fra maniaghêis

...dai curtisârs al'aministrazion.
Una volta tant, fasin fenta da no essi a vonde distanz, ma da essi in ostaria a bevi un taj e a discôri di Manià e di paesajo. Stasera cuant chi sareit clamâs a fâ una valutazion sul ridicul progjet presentât da chei dal Zillo (cal mena il boro a noaltris e tant di pì a voaltris chi seit clamâs a valutà li pacasadis prima ca sucedin...), provait a pensà a ducj chei paesans (e fra chiscjus cualchidun al sarà cençaltri vostri amigu o parint...) ca no volin la çoncjadura dal San Lurinç e ca si spetin da essi ben rapresentâz e tutelâz da voaltris. Stu colp li balonis ca an contât chei dal Zillo, a passin, e di tant, l'orli dal bocâl. Si ghi deit una man i passâit encja voaltris da brombui, esatamentri comi noaltris, chi però a difarença di voaltris no pudin fa nuja (il mesteî al'è il vostri... i seit pajâs par chel!) e cundipì a sares un tradiment tai confrons di chei ca vi an dat credit. La zent ae stufa marcida e no crôt pi ali istituzions... vidin doman cui cal varà rason!

Mandi ai vêirs maniaghêis.

Incjmò pacasadis...

Da un mêis a chista banda al'è spontât un'altri canteîr in chel di via dai Eroi, dulà chi na volta a êra la caserma dai Studa Foûcs e chi ades a son la Croûs Rosa e il Socòrs Alpin. Ducj a si spetavin cuissà ce scolvolgjment e invezit... nuja dal dut. La caregjada ae stada slargjada di pôc e nuja e a livel di circolazion no cambia nuja. Cambia invezit il colp di voli cal si arichis di catarinfrangenz di chei ca si impînin di rifles cui fanai e di strichis di pavè tal'asfalt (no si capis sa son di beleça o sa son li solitis monadis par fa ralentà li machis dulà chi za a van planisin...). Ogni noûf canteîr al samea pi chi altri frùt di un cal'à un fuart esauriment gnervôus e cal voûl fâlu vignì encja a chei altris. Chei ca rivaran in avrîl a varàn un biel ce fà sa an voja da comedà li robis e speran ca no veipin encja chei il mâl dal'asfalt. Tanti voltis par volei lassà un segn, a si riscja da fâlu sameà un segn tali mudandis!

Maman

Un po' di sucher e la pirula va iù...

Ogni tant samea di essi chei màs ca disin e ridisin li stesi robis mil voltis, ma viodûs i risultâs e la scjarsa considerazion pal parêir dala int forsi a voûl da cuntinuà a bati mil voltis il stes claut. La notizia ae tai gjornai e tala bocja di ducjus. Stasera chei dal Zillo a presentaran il progjèt di çoncjadura e racordadura dal San Lurinç (-48 metros s.l.m.). Volta remena, dopu essi stâs ostacolâs e parâs via dali zonis di Padua, a son rivâs tali nostri zonis, dulà chi cuntra la volontâ dala int (mituda par iscrit 4000 voltis) e cula probabil cueteça dali istituzions (ca no rapresentin par nuja la popolazion...) a fasin e remenin ce ca volin. La campagna publicitaria dal Zillo a dîs: Raggiungere la vetta è possibile in ogni attività o in qualsiasi competizione. Difficile è rimanervi a lungo... biela la menada, però al'è massa facil rivà in cima sbassant la ponta!
In chistu periodo in d'avin sintudis di duti li cualitâs: «no steit preocupâvi tant da Manià no si iôt nuja (dita da un pseudoarchitet...)» «e podopo chei vincj ca lavorin dentri ce fasini... (e chei altris cent chi tal fratimp a son falîs parcè no iu veu udâs e minçonâs)»
Ma par fà parà iu miei la pirula a son za prontis una schiria di operis (svintuladis tai gjornai) aprovadis par miliorà il paeîs (...e ducj sin poensan di chês apena finidis).
Avrîl nol'è lontan e la zent no dismintia;-)

Mandi a ducj... (escludûs racordadôurs e petonârs)

Da Manià a Hollywood

A Hollywood e in television si pos essi protagoniscj e cjapà premius encja cença essi atôurs o regjiscj, ma essint artigjans di lungja tradizion e vint una gran passion pal lavôur e par chel ca si fâ. Manià al'è il paeîs dali lamis, dali britulis, dai curtîs e di Fulvio Del Tin, un cal forgjea li armis chi podopo a vegnin mitudis in mostra tai museos (Cjastel Brant a Cison di Valmarin a Gurizze e nodome), tali galerîs storichis sparniçâdis pal mont (Tal tôur di Londra...) e ca fazin biela mostra tali peliculis dai cines e dala television. Una tradizion scuminçada par pura passion e pasatimp tai agns sesanta, insiemi al pâri Silvano (in tuna piçula uficina di via Col...), e doventada un mestêir a timp plen. Li armis e li armaduris di Del Tin a son aprezâdis dai colezioniscj di dut il mont pali fateçis e la cualitât, tant da essi dopradis encja tal Palio di Siena, tali varî ricostruzions storichis e tai cines (Ronin Hood, Braveheart, Il mestiere delle armi, La freccia Nera, tal prossin cine di Mel Gibson sui Maya e nodoma chiscju). Dutis li armis, prima da essi fatis, a son frut di studios tai archivios storics e tai documenz origjnai par essi ricostruidis secont il gjust criteri. In timps di "high tech" chei ca lavôrin cidins e "cul mâni" a son restâz pôcs... un di chiscju al'è a Manià.

Un mandi medievâl a ducj

Moûs di dîsi

Tala cjacarada furlana spes e volenteîr cuant ca si a voja da lassà un segn, o si a voja da dîsi alc cal'à da essi esplicit e cunçà li peraulis, a si doprin i moûs di dîsi. I vecjus a êrin usâs a vei ognun il siò marchio di fabrica e tancju di lôur a an scliçât dali frasis chi encja voi (ansi voi pi chi mai...) a sameinin cusidis su misura.
Par fa un esempli, cuant ca si fevela di stradis a si pos trancuilamentri dîsi: pêsu il tacon dal bûs! Cuant ca si cjacara cuntun politicant par fâlu niçà a si pos dîsighi: ...curta e alêgra! Cuant ca si fevela cuntun cal cambiea spes ideais (e and'è a vonde) si pos disighi: ti cambis scussa comi il madrac! Cuant chi seit davoôur a remenà alc in scarsela, e a vi domandin "...ce astu uvì dentri" i podeit rispundighi: un tintin bon cul mani di len! Cuant ca si fevela di stracaplaçis ca san simpri comi comedà li robis (...) a si dîs: ...chelì al si incjarpeda tala peça di formai, par no colà al si picja tal salât e dopu al cola tala damigjana di vin!
Samea fin dal'impusibul ce tant atuai ca son i môus di disi di na volta e comi ca si adatin ben ali peçotarîs ca si jodin in zîru pal paeîs.

Ma man e... no steit fâvi menà pal bôro:-D

Timp di çucja e buris

In periodo di sanz e dai muarz (miercui e zoiba stâs) la tradizion mangjativa paesana a si richis di doi prodoz puâres dala cjera: la çucja e li tistingis. Tai dis dulà ca si netin li tombis e si parta un flôur in simiteri (par pensâsi almancul na volta al'an di chei ca son zûs in denant) a si mangja la çucja barucja (fetis di çucja mitudis tal fôr a coi) si mangjin li buris e si bêif il vìn novel; la tradizion a projodeva encja li favis di Del Tin, ca no mancjavin mai tali taulis dai maniaghêis.
Na volta i omins a zevin tal cjampanili e a sunavin li cjampanis sbatocjanlis a man e tirant i sclops; prima però, par restà sveus e par no patì il frêit, a passavin in ostaria a bevi un pâr tajs. Li feminis invezit a stevin in cjasa cidinis a sgramolà il rosâri e prima da zi a durmì, a lasavin una podina plena di aga foûr dala puarta, par disetà i muarz ca pasavin par cjasa.

halloween ala furlana...

Alc a le alc, nuja a le...

Par no essi simpri chêi ca sberlin cuintri chel ca fazin li aministrazions, stu colp i duvin rindi merit a l'idea di meti arbui tala ritonda e in via Piave. Rindi merit parcechè intun periodo dulà che si sbassin li cimis dali mons, e di conseguença a si tainin centenârs di arbui, jodini plantà cualchidun nol'è mâl. Un tic di natura tal mieç di un serpenton di catram e peton. Un unicu apunt: ma l'êri propit necesari meti i cartei cui divietos propit davoûr ai arbui, parceche di ca a un pâr di agns, cuant che li ramaçis a menaran a plen, par iodi il cartel a volarà da vei davoûr un cortelaç.
Za chi sin davoûr disin encja che no sares malamentri niçâsi a projodi una pista ciclabil par chei vicjus ca tachin la riba e si cjatin davoûr li machinis cai sunin parceche no rivin a passà. Cualchidun al'à segnalât chi tala ritonda, tor li cinc cinc e mieza, al'è dut un casin di machinis e un cuntinuo e fastidiôus fiscjotà. Naturâl, ades ca son i arbui, a son tornâs encja i stornei!

Mandi a ducj